不知是否和嫲嫲去多咗街，在家又多咗婆婆同妹妹，近幾個月皓朗說話的能力高了不少，開始講句子。
食飯時會說：「飯飯好味道！」
婆婆有一天報告他自己講「拔蘿蔔」故事，爹哋媽咪都聽過，雖然只係講咗部分，「伯伯（種）蘿蔔（喺）呢度，（生得）好大，（伯伯）拔唔到，拔唔到，猫猫幫手，狗狗幫手，加油加油，拔到，好嘢！」但都開始有故事的初形。
星期天早上婆婆離開，告訴他要去那裡，爹哋剛巧也不在家，下午爹哋回來問婆婆在那裡，他便報告：「婆婆（返）屋企，煮飯（比）公公（食）。」
皓朗的另一強項是砌砌圖，他好有心機架，之前比他砌6 – 10磈的，好幾幅唔同的混在一起都可以自己分開砌好，仲砌得好快。媽咪見狀再買盒有28磈，以26個英文字母同圖案砌成一列火車的puzzle比佢，媽咪同婆婆都教過佢砌，諗住佢無咁快會學識，怎料不出兩天他已經懂得砌了，連爹哋都服咗佢。
皓朗玩砌圖的時候好認真咖，現在皓朗已經可以自己完成60塊的砌圖了！
前排屋企無咗姐姐，爹哋媽咪同婆婆都好忙做家務，洗衫掠衫是必定要做的一項，那天媽咪準備摺衫，皓朗自動幫忙，好有心機咁將啲衫拆下來，仲識分開不同的衣夾同衣架放好，拆衫的時間仲一路話比媽咪聽呢件係皓晴、呢件係皓朗添。又令媽咪覺得佢又大個仔咗。
皓朗終於排到入爹哋公司資助的幼兒園，9月就正式返學了。呢間學校返全日，因為有公司資助所以收費平啲，不過開心係因為很多人對學校的評價都好好，小朋友好鍾意返學，爹哋媽咪都覺得現階段咁樣較孩子們學到好多知識緊要。
不過學校比較細, 而且要出九龍返學都有啲擔心，但媽咪出席完家長會，聽完校長同主任講解學校的日常活動和教學理念，已經希望皓朗可以快啲就開始返學了。
新年第一炮，先講吓年初三兩兄妹大鄉里出省，同公公和姑媽一家去海洋公園。亞妹一到埗已經好開心，肯自己坐車仲腳FING FING，玩足全日都無扭計，仲全程都笑，又撩人玩。
第一站係新的海洋館，靚係靚，但其實細咗，以前一路行都睇到魚，依家一忽忽咁。
參觀完新的海洋館，剛剛海龍王餐廳開門，本來都諗住訂枱，但年初三只接受WALK IN，咁梗係食埋飯先啦，唔知係新開業運作未暢順定啲工作人員的問題，餐廳明明好多吉枱，但都要等好耐先入得，好彩餐廳內有個細細的玩具房，皓朗同表姐可以玩住等。
等到位啦，全日最滿意真係呢PART，雖然價錢同食物的水準和職員的服務不成正比，但我哋張枱貼住魚缸，一路食啲魚一路响身邊游過，正！下次有機會再去一定要BOOK返呢個位。
食完飯，啲細路全部無哂電要瞓覺，諗住先上山等佢地瞓醒睇海洋劇場表演，但登山䌫車同新的登山電車都大排長龍，都唔知要等幾耐。見熊貓館都要排隊，咁就排住先，排到佢哋都應該醒。皓朗真係臨到門口就醒咗，今日好好彩見到熊貓安安，媽咪去過睇熊貓好幾次，次次佢哋唔係瞓咗都係扒响度唔郁，第一次見佢咁活躍行來行去咋。
4隻大熊貓唔係放响同一個館，舊的熊貓館只係得安安佳佳，心心表姐在我們離開館後了才醒，見啲人龍唔係太長再排一次，可惜今次到安安瞓咗，只可以响電視睇佢瞓。咁我地就再去新的熊貓館，新館唔駛排隊，仲有小熊貓睇，可惜又係全部瞓哂。新的熊貓館比較大，同熊貓的距離近啲，下次可以直接去新館睇。
行完熊貓館，想去睇雀仔表演，但去到已經FULL HOUSE，咁就等睇威威劇場，表姐表妹要飲奶，皓朗未夠鐘飲，趁有小小時間去玩一轉旋轉木馬。
時間啱啱好，飲完奶威威劇場就開始，爹哋媽咪都係第一次睇，近距離睇海獅表演，小朋友應該睇得幾開心。睇完已經差不多5時，一心帶皓朗來睇海豚，下一站趕上山睇海洋劇場，吊車無可能排到，我哋試坐登山電車，好方便幾分鐘就上到山，但無風景睇都係失色啲。
上到山都係人山人海，海洋劇場已經坐滿人，連後面都企滿哂人，第二場要等多一個鐘，開場後兩個爸爸同小朋友騎膊馬睇，但真係太多人啦，姑丈再行吓睇到有金咭會員的貴賓室，仲有位，咁我哋就舒舒服服咁睇咗下半場，又一個好彩。
睇完天開始黑，亦開始涼，大人同小朋友都攰，開始要回程，但係落山超多人，結果我們撘登山電梯，在大樹灣出口轉乘巴士返正門走。
假期去海洋公園都預咗會多人，但真係諗唔到會多得咁緊要，只係兩、三年無去海洋公園，但海洋公園已經變哂，變咗身的海洋公園雖然靚咗，但好商業化，空間少咗好多，無咗以前開心溫暖的感覺，我鍾意舊的海洋公園多好多，真心覺得新不如舊。
後記：
皓朗睇完熊貓，真係有印象，在屋企扮熊貓行同瞓！
海洋公園在今個農曆新年期間入場人次高企，連續幾日都要停售即場門票，好彩我們為防無位泊車一早去，雖然超迫人但都叫睇哂想睇的嘢。
因為亞妹的來臨，加上媽咪轉工的關係，真係忙咗好多，連放相上Facebook都無時間，呢個blog更加塵封了。趁兔年新開始，媽咪“的”起心肝要將兩個李家小B的成長點滴記下來。
仲有唔夠3個月，李小B就會升“呢”做哥哥啦！可能已經係第二次做媽媽，又要照顧李小B，李小妹現在己經28週，都無响度報告妹妹的情況，為免妹妹呷醋 ，即刻報告最近一次做產前檢查情況。
大脾骨長度： 4.9 cm
頭仔直徑： 6.6 cm
身長： 21.8 cm
重量： 933g
雖然醫生說妹妹的生長較慢一點，照目前睇會比哥哥出世時輕少少。但李小妹現在應該已經有相當分量，最近這個星期除了媽咪可以感覺她郁，連爹哋隔住肚皮都見到啦。不過聽到醫生話妹妹較細，媽咪都即刻增加了食量，希望仲追得切啦。現在問李小B妹妹响邊，佢會摸吓媽咪嗰肚，叫佢錫吓妹妹，佢又會錫吓媽咪嗰肚，平時叫佢錫人無咁有求必應，爹哋媽咪希望佢地會相親相愛，因為爹哋媽咪兩個都一樣咁錫！
李小B對音樂好敏感，最鍾意三色台轉節目條clip，無論做緊咩，一聽到段音樂都會停低睇。之前聽到啲輕快的樂曲歌會點吓點吓頭咁跳舞，呢日唔知係咪睇咗Barney同獎門人，李小B變咗咁樣跳舞。
片段拍的時候李小B已經跳咗好多次，爹哋不斷重播段音樂，佢就不斷跳，爹哋媽咪睇到好好笑。
要李小B坐定食嘢都算OK，但食的時候佢會不停指呢樣指嗰樣叫你比嘢佢玩，為準備佢第日要自己吃東西，媽咪好早就比隻匙羹佢玩，後期姐姐仲比埋個杯佢。
自己吃東西就未試，但最近李小B就學識餵人食嘢，仲要學你講 “Um” 叫你食。
話咁快李小B就1歲大了，爹哋媽咪都覺得這一年過得好快，李小B剛出世的情況仍然記憶猶新，媽咪更加覺得這一年除了返工放工，就係趕返屋企，轉眼間你已長成一個小小人兒的模樣，識周圍行，識扭計，有自己的意見，爹哋媽咪放假在家照顧你比工作還要忙。可幸現在的李小B都算精靈活潑，得閒會攬吓你錫吓你，或對住你甜甜地笑，見到他這樣，還會有什麼怨言？
李小B的生日在復活節假之後，係平日，爹哋於是在兒童節那天約了同事和他們的小朋友來我們家的會所，慶祝兒童節也順道替李小B慶祝生日。李小B當日唔算太合作，唔多願留在Function Room，幾個小朋友的年紀差不多，未太識一齊玩，最開心應該是Bubble Time。
最後是蛋糕時間，媽咪無特別準備，只係訂了個代表Aiden的“A”字蛋糕，李小B對著這個蛋糕，聽著大家為他唱生日歌時很開心呢！更收到很多禮物，多謝爹哋的一班同事。
李小B生日那天下大雨，本來準備要去的地方都去不了，結果只是在會所的遊樂場玩，晚上再吃了生日蛋糕，這樣就過了第一個生日了。
1歲大的李小B
體重: 8.8KG 身高: 75CM 頭圍: 47CM
有8隻牙仔
好鍾意笑，和爹哋玩時更常常笑到 “卡卡聲”
識自己行 (但只限在室內，出街變樹熊唔肯落地)
好鍾意去街、開門關門、開/關各種電制、玩遙控
會講一些單字 (如花花、車車、去街、媽媽、奶奶、爹哋、姐姐、唔係、機等等)
識分爹哋、媽咪、姐姐、公公、婆婆
會收埋鍾意玩的東西在同一個地方
成日指呢樣指嗰樣
會揮手 “拜拜” 同 “HELLO”
會自己瞓响度飲奶奶，不過唔肯自己捧住奶樽
在外是個細膽鬼，好慢熱
李小B一向偏瘦，就快1歲大都只得19磅多啲，但手和腳都非常大力，比佢踢一腳或都打一下都真係幾痛，現在佢行得好穏陣，仲好鍾意攞住嘢行來行去，尤其鍾意攞住啲箱，雖然嗰箱入面無東西，但有佢半個人仔咁高，好大個都有啲重量，佢都係咁攞住周圍行。
