爹哋最近看著李小B玩，經常會笑說：「媽咪，亞仔好似識多咗好多嘢咁。」
媽咪其實很有同感，李小B現在除了會自己玩，仲會撩人玩，同爹哋媽咪多咗好多互動，仲咩都識聽，成日想講嘢，開始有自己的意見。
不過小朋友學習的能力真係好高，之前李小B响大人床成日想用頭落地，媽咪當然每次都阻止佢啦，仲教佢應該點落地，上星期李小B開始爬梳化，媽咪又同樣咁教佢。教佢嗰時都唔覺得佢有聽你講，誰知李小B一天在床上玩玩吓突然向後爬向床邊，媽咪最初唔為意仲拉住佢，跟住先醒覺原來佢想落床，媽咪那一刻當然樂透，立即叫佢自己再試。
上回講過李小B可以扶住嘢行，現在已經行得好快，有時甚至唔扶都行到兩三步添。還有多生活瑣事都令人驚嘆小朋友的學習能力，唯有時刻提醒自己在他面前要做個好榜樣，不論他是否明白也儘量告訴他正確的概念，也暗自慶幸他有這樣強的學習能力。
落地有啲失手
成功, 好嘢!!
李小B不經不覺已經9個月大了，媽咪同爹哋都覺得時間飛逝，尤其最近這一、兩個月，小B的成長好像特別快，叻咗好多。
李小B現在有8隻牙仔，媽咪同爹哋好鍾意見到佢笑，因為佢啲大板牙好大隻，笑起來好可愛！
近來佢開心同聽到音樂會把頭前後咁郁，爹哋初初唔知佢做咩，話佢好似機械人，原來佢學咗屋企隻Donald公仔，係跳緊舞，真係俾佢笑死。
李小B同爹哋一樣，好多嘢講，現在成日 “嘰嘰咕咕”想學講嘢，好多時圓圓地張大佢個口，都會發很多唔同的音，如“爸爸、媽媽”，但就唔一定係叫爹哋媽咪。
11月尾李小B開始可以扶住啲櫃自己企起身，現在已經可以企得好穏陣，放手唔扶嘢都可以企到一陣，仲識扶住啲櫃同牆行，而且行得好快tim。李小B對鏡頭好敏感又八卦，一見到你影佢佢就爬來要睇，好難得影到佢行哂全程。
有見上次元朗公園之行李小B都好ENJOY，趁星期日是婆婆的生日，我們舉家再一次親親大自然之旅，目的地是廸欣湖。
姐姐放假，媽咪同爹哋一早就忙個不停，幸好李小B很合作，爹哋媽咪準備時乖乖在playpan內自己玩，完全無扭計，11點左右準時出發。到達廸欣湖已差不多12時，$25一小時的停車場居然要大排長龍，可幸公公婆婆和我們一起，可以留下爹哋一個等車位。
時間尚早，公園內人還不多，廸欣湖地方很大，那天天氣很好空氣很清新，我們找到一處較平坦又有大樹蔭的草地，擺好架步李小B第一個開餐，再一次在微風和陽光中嘆奶奶。
李小B今天心情很好，和公公婆婆玩得不亦樂乎，大家野餐過後便圍著公園行一圈，下午人流漸多，我們也玩得差不多要走了，又過了一個愉快的下午。
難得最近天氣回暖，星期六中午陽光普照，爹哋媽咪決定同李小B去元朗公園走一趟，坐草地、玩Bubbles同呼吸新鮮空氣。
準備好要出發了！著了爹哋同事們送的衫仔和帽仔，仲有J姨姨同E姨姨送的鞋仔，好型仔呀！
公園的人不多，在大樹蔭下擺好了架步，媽咪就去買Bubbles，但係風太大，Bubbles好快吹走，李小B追唔到。在樹蔭和微風中嘆過奶奶，扶住大樹幹企吓，再盪了人生第一次鞦韆 (差點在上邊瞓著) ，一家三口過了一個愉快的中午。
皓朗的體重像媽咪 – 輕，但係媽咪覺得佢食得都唔少，一日飲5 – 6餐奶奶(7安多啲)，加早上生果蓉做小食，晚上米糊加蔬菜，皓朗好enjoy食嘢，而且好“為食”，見到佢個碗已經會吞口水，見到人食嘢會咀郁郁。
媽咪見佢咁，特別買咗啲BB餅乾，開頭唔識食仲食埋自己個拳頭！
夏天即將結束，雖然皓朗太小未能前往沙灘暢泳，但去沙灘走走，望吓海景也無妨。這天爹哋媽咪也放假，我們探完姑媽、姑丈和心心表姐，就去附近的黃金海岸沙灘走走。
結果再次證明皓朗是個膽小鬼，爸爸想要把你抱到水裡去，你便“呱呱叫”了，連放你在沙上走你也不肯。這次沙灘初體驗是失敗了，但享受近黃昏的沙灘景色也不錯。爸爸游水了得，希望你長大後不會怕水吧！
